Reversed Evolution...

Minsan ako ay napatingin sa salamin. Pilit kong pinagmasdan ang aking mukha, braso, binti at dibdib sa harap ng salamin. Totoo yata yung kasabihan na habang tumatanda ka ay bumabalik ka sa pinanggalingan mo. Napansin ko kasi, every year na lang simula nang mag 25 years old ako ay pahaba ng pahaba yung buhok ko sa katawan. Pakiwari ko bumabalik na ako sa pagka unggoy. Wag ka nang umangal, late bloomer talaga ako. Bente singko na ako tinubuan ng mga wanted at unwanted hairs. Nung bente pa lang ako, sing kinis pa ng murang labanos ang aking mga hita at binti.

As I was saying, lahat na lang humahaba – buhok sa binti, buhok sa kili-kili, buhok sa ilong. Pinakakinaiinisan ko yung buhok sa ilong, bukod kasi sa humahaba na’t lumalabas sa butas ay kulay abo at puti pa kung minsan - stand out galore.


Lately, may napansin pa akong mas hindi kanais nais: tinutubuan na rin ako ng buhok sa pisngi. Malamang hindi ako galing sa unggoy, hmmm.. baka sa tigre o kaya leon. Pero ayokong maging pusa, may kilala kase akong mamamatay pusa.

Usapang Hotdog

Noong Martes, napagawi ako sa Jollibee. Para sa mga banyagang walang muwang kung sino si Jollibee - sya yung matabang bubuyog na nagpataob kay Ronald McDonalds on this side of the world. Sana rin ay marunong ang mga banyagang ito na umunawa ng Tagalog upang magkasilbi ang aking effort na magpaliwanag.

Nakangiti kong pinagmasdan ang menu ng naturang kainan at napagtanto kong karamihan ng pagkain dun ay puro masasaya at maliligaya gaya na lang ng Chicken Joy (Manok Ligaya), Jolly Crispy Fries (Masayang Malutong na Pritong Patatas), Jolly Krunch Twirl (Masayang Malutong na Paikot-ikot) at Jolly Hotdog (Masayang Hotdog). Sa laht ng mga ito, tila walang kalaban ang Jolly Hotdog sa kakumpetensya ng Jollibee na McDonalds. Sabagay, Hindi naman magandang pakinggan ang McDonald's Hotdog. Wala ring appeal ang suggestion ni Mommy Joy na McDog. Pero bakit nga ba? Bakit nga ba walang Hotdog sa McDo? Ito ang isang bagay na bumabagabag sa akin sa loob ng matagal na panahon (tatlong araw to be exact).



Noong Miyerkules, napagawi naman ako sa Tapa King na hindi lang naman tapa ang tinda kundi pati internet card at food supplements. Napansin ko rin na may tinda silang hotdog bagamat hindi kagaya ng sa Jollibee na naiipit sa tinapay, may kasama itong fried rice at fried egg. Ngunit ang pumukaw ng aking atensyon ay ang pangalan nito sa menu. Guess what? Dyaaaraaaannnn.... Hapi Hotdog!

Naisip ko lang, sadya bang masasaya ang hotdog? Sa takdang panahon, marahil ay mabibigyan ito ng liwanag.